അമ്മയ്ക്കൊരു മുട്ടു വേദന. എന്താവാം കാരണം? മൂന്നു വയസ്സാവാറായ 'ബിഗ്‌ ബോയ്‌' കുട്ടന്‍ ഇപ്പോഴും അമ്മയുടെ ഒക്കത്ത്‌ കേറിയാണ്‌ പലപ്പോഴും മോളില്‍ പോകാറ്‌ എന്നതാണ്‌ അമ്മ കണ്ടെത്തിയ കാരണം.
"ചിന്നൂ, ഇനി അമ്മയോട്‌ എടുക്കാന്‍ പറയരുത്‌, ട്ടോ... അമ്മയ്ക്കൊരു മുട്ടു വേദന"
"എവ്‌ടെ?" ചിന്നൂന്റെ ചോദ്യം ആത്മാര്‍ത്ഥമായിരുന്നു. മിടുക്കന്‍... ഇനി എടുപ്പിക്കില്ലായിരിക്കും.
5 മിനിട്ട്‌ കഴിഞ്ഞില്ല.
"അമ്മേ... ചിന്നൂന്‌ മോളില്‍ പോണം. ചിന്നൂന്‌ കാല്‌ കഴച്ചു. അമ്മ എടുക്ക്‌"
ദാ... കിടക്കുണൂ...!:(
"ചിന്നൂ... അമ്മയെക്കൊണ്ട്‌ എടുപ്പിക്കല്ലേ... അമ്മയ്ക്ക്‌ വയ്യ എന്ന് പറഞ്ഞില്ലേ? അമ്മയ്ക്ക്‌ വയ്യാണ്ടായാല്‍, കുട്ടന്‍ അമ്മേ ഹോസ്പിറ്റലില്‍ കൊണ്ടു പോവ്വേണ്ടി വരും, കേട്ടോ"
ഭീഷണിയായിരുന്നു. പക്ഷേ ഫലിച്ചില്ല. :(
"ചിന്നൂം അച്ഛനും കൂടി കൊണ്ടുപോവും. കാറില്‍ കേറ്റി കൊണ്ടു പോവും. അച്ഛ അമ്മേടെ തലേല്‌ പിടിക്കും. ചിന്നു കാലില്‌ പിടിക്കും".
അസ്സലായി!കൂടുതല്‍ വാചകമടിക്കാന്‍ നിന്നില്ല. എടുത്ത്‌ മോളിലേക്ക്‌ കൊണ്ടു പോയി. മുകളില്‍ എത്തിയതും താഴെയിറങ്ങി പുത്രന്‍ ഒരോട്ടം. തിരിച്ചെത്തിയത്‌ കൈയില്‍ 'വോലിനി'യുമായി.
"അമ്മ മുട്ടില്‍ പുരട്ടിക്കോ...വേദന മാറട്ടെ"!
എത്ര സ്നേഹമുള്ള പുത്രന്‍! :)
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ